Олоҕурбут үгэстэрбит.

     Биһиги оскуолабытыгар эмиэ ханнык баҕарар оскуолаҕа буоларын курдук өр сылларга олоҕуран кэлбит үгэстэрдээхпит. Ол курдук үөрэх дьылын саҕаланыытыгар балаҕан ыйыгар «Күһүҥҥү кросс» буолар. Манна оҕолор үс бөлөҕүнэн: (I бөлөххө 1-3 кылаас, II бөлөххө 4-6 кылаас, III бөлөххө 7-9 кылаас оҕолоро) арахсан кылгас, уһун дистанцияларга сүүрэллэр. Онтон учууталлар, төрөппүттэр доруобуйаларын чэбдигирдэ хаамаллар.

       Оҕолор биир сөбүлүүр бырааһынньыктарынан «Күһүҥҥү баал» буолар. Бу тэрээһиҥҥэ кылаастар «Баай остуол», «Уратытык оҥоһуллубут бүлүүдэ», «Айылҕа дьиктитэ» -араас быһыылаах оҕуруот астарын көрүҥнэригэр, «Саамай, саамай улахан…», авангарднай муода (айылҕа матырыйаалларыттан көстүүмнэр) уо.д.а көрүҥнэргэ күрэхтэһэллэр.

        Кулун тутарга алын кылаас кыргыттарыгар «Кэрэчээнэ Куо» күрэх ыытыллар. Кыргыттар бары көхтөөхтүк кытталлар. Кинилэр «Бэйэни билиһиннэрии», «Талба талааны көрдөрүү», «Өркөн өй», «Сахалыы таҥас» уо.д.а түһүмэхтэри ааһаллар.

       Муус устарга аҕа күрэҕэ буолар. Онно аҕалар уолаттарын кытта киирэн, уол оҕо күүһүн-уоҕун, сымсаҕай туттуутун, тобуллаҕас толкуйун, дьиэҕэ-уокка сыһыаннаах үлэҕэ сыстыгаһын көрдөрөр араас түһүмэхтэргэ кытталлар. Хаһыс да сылын бу оонньуу күрэх кыайыылаахтара улууска, республикаҕа бириистээх миэстэҕэ  сылдьаллар.

       Улууска ыытыллар «Безопасное колесо» диэн күрэххэ төрөппут Никитин Василий Никитич салалтатынан биһиги оскуолабыт оҕолоро, кэккэ сылларга бириистээх миэстэлэргэ тиксэллэр.

       Төрөппут комитетын тэрийиитинэн  «Аҕам, ийэм уонна мин-спортивнай дьиэ кэргэммит» диэн күрэх төрөппуттэр ортолоругар үгэс буолан ыытыллар, ону таһынан «Көрдөөх стартар» диэн күрэххэ учууталлар, төрөппуттэр, оҕолор уонна оскуола үлэһиттэрин холбоһуктара хамаандаларга арахсан күрэс былдьаһаллар.

       Ыам ыйыгар оҕолор саамай сөбүлүүр тэрээһиннэринэн туризм буолар. Онно баран оҕолор туризм күрэҕэр ыытыллар үгүс көруҥҥэ бэлэмнэрин, ким төһө кыайыыга дьулуурдааҕын, бэйэ-бэйэлэригэр үтүө сыһыаннарын көрдөрөллөр. Бу күрэхтэһиигэ оскуола оҕотун 3 бөлөҕө, төрөппүттэр уонна учууталлар бөлөхтөрө кыттыыны ылаллар. Күрэхтэһии олус хатыһыылаахтык ааһар буолан, оҕолор биһирэбиллэрин ылар, өйдөрүгэр умнубаттыы хаалар.